Mwen ta renmen pataje reflexsyon m sou sa m panse apre katastròf Ki sot pase ann Ayiti 12 janvye 2010 la.
Lè lanati andyable, lè l ap montre n sa l peze
Nou tout kouri di : Sa n fè w Bondye?
Èske se sa n rele demokrasi? Nou pa kwè sa!
Lanati pa fè pa pèsòn, lè w tande l frapye l
Al eseye konprann sa ki sot rive ann Ayiti a
Si se konsa demokrasi a mache, fè travay li
Nou pa kwè l ap jwenn anpil fanatik sou latè beni
Lè se malè sèlman li jete sou tout moun
Lè se dezolasyon ak soufrans li simen toupatou
Nou ta di se reflechi li voye nou tout al reflechi
Si se konsa pou dyab montre puisans li
Nou pa janm bezwen konn egzistans li bò kote n
Pi fò nan nou deja mizerab. Nou enpuisan devan malè n
Lè n ap lapriyè, nou pa konn sa pou n di ankò
O gras mizèrikòd! Fè pa pitit ou yo non!...
Lè nou met jenou n atè, mande Bondye pou n wè klè
Ki wout nou dwe pran pon n evite chemen malè
Epi, pa bouke preche Lanmou ak Solidarite
Mande Bondye pou l ban nou ou Leta ki responsab
Pou tout Sitwayen alawonnbadè respekte Lalwa
Si tout ayisyen te konn obeyi Lalwa Peyi yo
Gen anpil Katastròf yo ta ka evite. Sa se verite!
Nou tout dwe pran leson sou sa k sot pase nan peyi n
Nou tout dwe reflechi ansanm, pou n pa bay malè rezon sou nou
Si n kòmanse fè sa, nou pa kwè n a jwenn bon rezilta ?
An nou chèche Konprann ansanm sa demokrasi vle di
Pou n wè sa pou n fè pou n pa tonbe nan tchouboum
Nou gen lè pa wè nan ki sa nou ye la a ?
Apre desas ki sot pase lakay la, si nou menn ayisyen nou pa chanje
Nou pap janm jwenn remèd. N ap detwi peyi n moso pa moso
Li lè pou n konprann sa demokrasi vle di tout bon
Pa gen anyen ki ka regle nan rayisans ak inegalite
Lè a rive pou n di dyab : « Mete kò w sou kote ! alelouya !
Met kò w sou kote! Renn nan nan men n! Nou vle vanse!
N ap leve! youn ap bay lòt lanmen jouk nou rive
Nou tout, nenpòt ki bò nou ye, ki gen chans ret kanpe toujou
An n bay lakolad, an n pa pè fonse, an n pwofite de chans nou
De tout èd nou jwenn pou n met Ayiti kanpe sou de pye l
An n fè sèman sèt fwa pou n chanje konpòtman nou
Pou n gen ou Gouvènman ki responsab ak sitwayen ki onèt
Lè a rive pou n rasanble tout fòs ak konesans nou
Pou nou tout travay sou priyorite peyi n tout bon
Jodi a, se pou tout sitwayen ayisyen trouse manch yo
Pou yo patisipe nan gwo kokenn chenn koumbit
Ayiti bezwen pou l refè. Gen ijans, nou pa ka pèdi tan.
Tati Edith
Edith J. B. Moïse
Fevriye 2010